Prestur.

Foreldrar: Síra Gunnar Pálsson á Gilsbakka og þriðja kona hans Þórunn Björnsdóttir lögréttumanns í Stóra Skógi, Guðmundssonar, Lærði í Skálholtsskóla, var síðan í þjónustu Brynjólfs byskups Sveinssonar, fór utan 1671, skráður í stúdentatölu í háskólanum í Kh. 17. okt. s. á., fekk vitnisburð frá Óla Borch prófessor 24. maí 1673 og mun s.á. hafa komið til landsins, gekk þá í þjónustu Gísla byskups Þorlákssonar, hefir vígzt kirkjuprestur að Hólum 1676, var síðan stundum í visitazíum fyrir byskup. Hann veitti sterka mótspyrnu Jóni byskupi Vigfússyni, fór því frá Hólum og utan 1685, í þeim kærumálum, kom aftur 1686.

Var kirkjuprestur í Skálholti 1688 til æviloka, varð og prófastur í Árnesþingi og var í visitazíuferðum fyrir byskup 1688–90. Talinn mjög vel gefinn. Þýddi J. Lassenius: Ein nytsamleg bænabók (Hól. 1682, 1746, 1772); L. Lossius: Medulla epistolica, Skálh. 1690.

Eftir hann er útfm. (Kristileg líkpredikun) Gísla byskups Þorlákssonar, Hól. 1685. Ókv. og bl. (HÞ.; SGrBf.).