Prestur. Faðir: Kolbeinn Sigurðsson. Kemur við skjöl og er orðinn prestur 1526. Fekk síðar Saurbæ á Hvalfjarðarströnd, færðist að vísu undan kirkjuskipaninni 1542, en virðist samt hafa haldið Saurbæ áfram, og þar er hann 1553. JH. Prest. segir, að hann hafi fært bú sitt að eignarjörðu sinni, Botni í Hvalfirði, og þar bjuggu sumir niðja hans. Hann var auðmaður mikill.

Börn hans (með Karítas Sigurðardóttur): Hallur sýslumaður í Hjörsey, Þorlaug átti Jón Guðmundsson í Einarnesi(?), Halla f.k. Brands sýslumanns Einarssonar á Snorrastöðum, Ari á Fitjum, Ingibjörg. Síra Ólafur ættleiddi börn sín, og varð löngu síðar langvinnt deilumál um arf eftir hann (Dipl. Isl.; Alþb. Ísl.; PEÓI. Mm.; SGrBf.).