Bóndi, stúdent.

Foreldrar: Árni lögréttum. Pálsson á Skúmsstöðum á Eyrarbakka og kona hans Ástríður Sigurðardóttir í Bakkárholti, Ólafssonar. Mun hafa komið í Skálholtsskóla um 1657, stúdent um 1663, fekk umboð byskupstíunda í Árnesþingi 1664, bjó fyrst á Þórustöðum efri í Ölfusi, en frá 1679 á Hjalla, er orðinn geðbilaður 1683, því að það ár lét faðir hans í lögréttu svifta hann fjárforráðum, meðan þessi bilun stæði (alþb. 1683). Er á lífi 1689.

Kona: Guðrún Jónsdóttir í Nesi í Selvogi, Pálssonar. Dætur þeirra taldar: Guðríður, Guðrún. Honum er í sumum ritum ruglað saman við Símon Árnason að Dysjum á Álptanesi, síðar í Örfirisey (HÞ).