Prestur.

Foreldrar: Jón Sigurðsson í Kristnesi og kona hans Guðríður Torfadóttir sýslumanns á Kirkjubóli, Jónssonar. Skráður í stúdentatölu í háskólanum í Kh. 9. dec. 1616, hefir vígzt að Helgafelli 1622, tekið við að fullu í fardögum 1623, drukknaði í Helgafellsvatni. Hans getur Jón lærði Guðmundsson að því að hafa brennt skjöl Helgafellsklausturs.

Kona (5. okt. 1623). Ólöf Jónsdóttir lögmanns á Reynistað, Sigurðssonar. Barn þeirra, borið eftir lát föður síns, dó þegar. Ólöf ekkja hans átti 1625 Jón Arngrímsson prests lærða, og bjuggu þau á Ökrum, en slitu samvistir og voru skilin með dómi 1628. Síðast átti Ólöf (1632) Hallgrím Halldórsson (lögmanns, Ólafssonar) á Víðimýri (HÞ: SGrBf.).