Bóndi (stúdent?).

Foreldrar: Síra Sigurður Árnason hinn síðari á Skorrastöðum og kona hans Guðrún Jónsdóttir prests að Hofi í Álptafirði, Einarssonar. Hann lærði í Skálholtsskóla, fekk vorið 1670 léðan hest hjá byskupi austur, er skóla var sagt upp; má vera, að hann hafi orðið stúdent þá, en engar sannanir eru fyrir því, að hann hafi orðið það. Hann bjó á Ferstiklu á Hvalfjarðarströnd, að því er talið er, og mun hafa lifað fram yfir 1700.

Kona: Þuríður (f. 6. mars 1660) Hannesdóttir prests í Saurbæ á Hvalfjarðarströnd, Björnssonar. Sigurður lögmaður Björnsson, föðurbróðir Þuríðar, telur börn þeirra: Vilborgu og 3 Sigurða; hefir hinn síðasti Sigurðanna komizt á legg, er 16 ára í Saurbæ 1703, með móður sinni (HÞ.).