--Sýslumaður. --Foreldrar: Síra Benedikt Sveinsson, síðast í Hraungerði, og kona hans Oddný Helgadóttir að Hliði á Álptanesi, Jónssonar. F. að Vogsósum. Tekinn í Bessastaðaskóla 1816, stúdent þaðan 1823, með góðum vitnisburði (er þó talinn þar lítill iðjumaður framan af og háttsemi hans misjöfn). Varð s. á. skrifari hjá Bonnesen sýslumanni á Velli í Hvolhrepp og var það, til þess er hann fór utan, 1830, tók próf í dönskum lögum 2. maí 1831, með 1. einkunn, kom út s. á. og varð aftur skrifari á Velli, en árið 1832 gerðist hann skrifari hjá Grími amtmanni Jónssyni á Möðruvöllum, en varð að fara þaðan um jól s.á., með því að hann kynnti sig þar ekki vel (sjá sendibréf síra Þorsteins Helgasonar 4. mars 1833 í Lbs. 202, fol., og Björns Jónssonar 11. febr. 1833 í Lbs. 351, fol.). Eftir það fór hann aftur til Kaupmannahafnar og var þar alllengi við ýmis störf, einkum skriftir. --Varð síðar um hríð skrifari hjá Stefáni landfógeta Gunnlaugssyni. Fekk Barðastrandarsýslu 10. maí 1847, en Borgarfjarðarsýslu 16. maí 1850. Andaðist úr lungnabólgu í Höfn í Melasveit. --Var að upplagi gáfumaður, en svolamenni, svo að hann kunni sér vart hóf. Kvæntist ekki, en átti 3 launbörn, hið fyrsta með Önnu Kristínu Eiríksdóttur dannebrogsmanns að Ási í Holtum, Sveinssonar, og hét það Steinunn, átti Grím Ólafsson að Hólmi í Seltjarnarneshrepp; annað með Kristínu Gunnarsdóttur í Hvammi á Landi, Einarssonar, og var það Borghildur, átti Þórð Þórðarson í Sumarliðabæ, hið þriðja er nefnt Brynjólfur, var í vinnumennsku í Eystrahrepp (Bessastsk.; Tímar. bmf. III; BB. Sýsl.; HÞ.). --Brynjólfur Thorlacius (Þórðarson) (28. sept. 1681–I. nóv. 1762). Sýslumaður. --Foreldrar: Þórður byskup Þorláksson og kona hans Guðríður Gísladóttir sýslumanns að Hlíðarenda í Fljótshlíð, Magnússonar. Stúdent úr Skálholtsskóla 1697, skráður í stúdentatölu í háskólanum í Kh. 22. okt. s.á. Ekki stundaði hann þar nám lengi. --Bjó hann síðan með móður sinni að Hlíðarenda, en var í Bæ á Rauðasandi veturinn 1704–5, fór þá aftur að Hlíðarenda og var þar til dauðadags. Hann var settur sýslumaður í Rangaárþingi 1711–14, meðan Hákon sýslumaður Hannesson átti málaferli, en honum hafði verið vikið frá, og er hann bar hærra hlut fyrir hæstarétti, fekk hann sýsluna aftur. Brynjólfur var utanlands veturinn 1715–16 og fekk þá (30. mars 1716) veiting konungs fyrir Árnesþingi, en sleppti henni aftur 1721, með því að hann fekk ekki að halda lögsagnara þar og var boðið að búa í sýslunni, en það vildi hann ekki. Hann átti deilur við ýmsa, báða byskupana (Jón Vídalín og Jón Árnason), Hákon sýslumann Hannesson o. fl. Vafstur nokkurt átti hann af strandi herskipsins Gothenburg á Hafnarskeiði 1718. Hann var auðmaður mikill, enda erfði hann mikið fé eftir foreldra sína og fekk auð með konum sínum. --Hann var og talinn höfðingi mikill og veitull, en ekki hálærður eða skarpvitur. Hann fekkst við að yrkja, þótt ekkert sé prentað eftir hann (kvæðin auðfundin eftir Lbs.). Kona 1 (31.ág. 1704): Þrúður (f. 31. dec. 1683, d. 4. sept. 1707) Þorsteinsdóttir; þau bl. --Kona 2 (27. sept. 1711): Jórunn (f. 29. sept. 1693, d. 8. júní 1761) Skúladóttir prests á Grenjaðarstöðum, Þorlákssonar. --Börn þeirra, er upp komust: Þórður klausturhaldari í Teigi, Jón klausturhaldari síðast að Stóra Núpi, Helga átti Sigurð alþingisskrifara Sigurðsson á Hlíðarenda, Skúli stúdent, Á. 1736 (BB. Sýsl.; HÞ.).